പ്രണയവര്‍ണ്ണങ്ങള്‍






മുറ്റത്തെ മണല്‍ തരിയില്‍
പതിക്കും മഴത്തുള്ളിക്കുണ്ട്
ഇന്നെന്‍ മറവിയെ  മയക്കും  തണുപ്പ്‌


തുറന്നിട്ട ജനാലയിലൂടെ
കാണും വീഥിക്കുണ്ട്
ഇന്നെന്‍ പ്രാണനെ കൊതിപ്പിക്കും വര്‍ണ്ണം


ഓടുകല്‍ക്കിടയില്‍ വിടവിലൂടെ
തെളിയും വിയത്തിനുണ്ട്
ഇന്നെന്‍ അന്തരംഗം കുളിര്‍പ്പിക്കും നീലിമ


പൂമുഖ വാതിലിലൂടെ
മനം കവരും പനിനീര്‍ പൂവിനുണ്ട്
ഇന്നെന്‍ സ്മരണയെ ഇരട്ടിക്കും അരുണിമ


വിദൂരതയില്‍ അലയടിക്കും
തിരകള്‍ക്കുണ്ട്
ഇന്നെന്‍ പ്രണയത്തെ അറിയിക്കും അഴക്‌


മുറിയില്‍ നിറഞ്ഞു കിടക്കും
പുസ്തകങ്ങള്‍ക്കുണ്ട്
ഇന്നെന്‍ ബാല്യത്തെ അനുസ്മരിപ്പിക്കും സുഗന്ധം


കണ്ണാടിക്കു മുന്നില്‍ തെളിയും
എന്‍ വിസ്മേര വദനത്തിനുണ്ട്
ഇന്നെന്‍ ആത്മാവിനെ ഉണര്‍ത്തും തിളക്കം


വിനിദ്ര നിശായാമങ്ങള്‍ക്കുണ്ട്
ഇന്നെന്‍ കനവുകളെ
നിര്‍ജ്ജാതമാക്കും നിറഭേദങ്ങള്‍


ഓര്‍മകളില്‍ തുടിക്കും
നിന്‍ കരലാളനത്തിനുണ്ട്
ഇന്നെന്‍ പ്രണയത്തെ പുഷ്പ്പിക്കും മധുരിമ


ഏന്റെ ജീവനില്‍ കൂട്ടായി
വന്ന നിന്നിലുണ്ട്
ഇന്നെന്‍ മോഹത്തെ വിലോലമാക്കും തീവ്രത


പരസ്പരം ഒന്നായ നമ്മിലുണ്ട്
നമ്മുടെ പ്രണയത്തെ
സഫലമാക്കും ആര്‍ദ്രത ..